Дракон-Право
Автоматическая правовая система

Ю.И. Бытко, С.Ю. Бытко

Сборник нормативных актов по уголовному праву России X–XX веков / Краткая история уголовного права России. Нормативные акты X-XVIII веков

Русская правда (пространная редакция)

Сборник Оглавление Назад Вперёд

РУССКАЯ ПРАВДА (пространная редакция)

  1. А же убиеть муж мужа, то мьстити брату брата, любо отцю, ли сыну, любо братучадо, ли братню сыновы; аще ли не будеть кто его мьстя, то положити за голову 80 гривен, аче будеть княжь мужь или тиуна княжа; аще ли будеть русин, или гридь, любо купець, любо тивун бояреск, любо мечник, любо изгой, ли словенин, то 40 гривен положити за нь.

  2. По Ярославе же паки совкупишеся сынове его: Изяслав, Святослав, Всеволод и мужи их: Коснячько, Перенег, Никифор и отложиша убиение за голову, но кунами ся выкупати; а ино все, яко же Ярослав судил, такоже и сынове его уставиша.

  3. О УБИЙСТВЕ. Аже кто убиеть княжа мужа в разбои, а головника не ищють, то виревную платити, в чьей же верви голова лежить, то 80 гривен; паки ли людин, то 40 гривен.

  4. Которая ли вервь начнеть платити дикую виру, колико лет заплатить ту виру, зане же без головника им платити.

  5. Будеть ли головник их в верви, зан(е) к ним прикладываеть, того же деля им полагали головнику, любо си дикую виру; но спла(ти)ти им вообчи 40 гривен, а головничьство, (а то) самому головнику; а в 40 гривен ему заплатит ис дружины свою часть.

  6. Но оже будеть убил или в сваде, или в пиру явлено, то тако ему платити по верви ныне, иже ся прикладывають вирою.

  7. ОЖЕ СТАНЕТЬ БЕЗ ВИНЫ НА РАЗБОИ. Будеть ли стал на разбой без всякоя свады, то за разбойника люди не платять, но выдадятъ и всего с женою и с детми на поток и на разграбление.

  8. Аже кто не вложиться в дикую виру, тому людье не помагають, но сам платить.

  9. А се покони вирнии были при Ярославе: вирнику взяти 7 ведер солоду на неделю, (о)же овен любо полоть, любо 2 ногате; а в середу куна (о)же сыр, а в пятницю тако же; а кур по двою ему на день, а хлебов 7 на неделю, а пшена 7 уборков, а гороху 7 уборков, а соли 7 голважень; то то вирнику со отрокомь; а кони 4, конем на рот сути овес. Вирнику 8 гривен, а 10 кун перекладная, а метелнику 12 векшии, а съсадная гривна.

  10. (О вирах). Аже будеть вира во 80 гривен, то вирнику 16 гривен и 10 кун и 12 векши, а переди съсадная гривна, а за голову 3 гривны.

  11. О КНЯЖИ МУЖЕ. Аже в княжи отроци, или в конюсе, или в поваре, то 40 гривен.

  12. А за тивун за огнищный и за конюший, то 80 гривен.

  13. А в сельскомь тивуне княже или в ратайнемь, то 12 гривен.

  14. А за рядовича 5 гривен. Тако же и за бояреск.

  15. О РЕМЕСТВЕНИЦЕ И О РЕМЕСТВЕНИЦЕ. А за ремественика и за ремественицю, то 12 гривен.

  16. А за смердии холоп 5 гривен, а за робу 6 гривен.

  17. А за кормилця 12 (гривен), тако же и за кормилицю, хотя си буди холоп, хотя си роба.

  18. О ПОКЛЕПНЕЙ ВИРЕ. Аще будеть на кого поклепная вира, то (о)же будеть послухов 7, то ти выведуть виру; паки ли варяг или кто ин то два.

  19. А по костех и по мертвеци не платить верви, аже имене не ведають, ни знають его.

  20. АЖЕ СВЕРЖЕТЬ ВИРУ. А иже свержеть виру, то гривна кун сметная отроку; а кто и клепал, а тому дати другую гривну; а от виры помечнаго 9 (кун).

  21. Искавше ли послуха, (и) не налезуть, а истьц(ь) начнеть головою клепати, то(да)ти им правду железо.

  22. Тако же и во всех тяжах, в татбе и в поклепе; оже не будеть лиця, то тогда дати ему железо из неволи до полугривны золота; аже ли м(е)не, то на воду, оли то до дву гривен; аже мене, то роте ему ити по свое куны.

  23. Аже кто ударить мечемь, не вынез его, или рукоятию, то 12 гривен продажи за обиду.

  24. Аже ли вынез меч, а не утнеть, то гривна кун.

  25. Аже кто кого ударить ботогомь, любо чашею, любо рогомь, любо тылеснию, то 12 гривен.

  26. Не терпя ли противу тому ударить мечемь, то вины ему в томь нетуть.

  27. Аче ли утнеть руку, и отпадеть рука или усхнеть, или нога, или око, или не утнеть, то полувирье 20 гривен, а тому за век 10 гривен.

  28. Аже перст утнеть кии любо, 3 гривны продаже, а самому гривна кун.

  29. А ПРИДЕТЬ КРОВАВ МУЖ. Аже придеть кровав муж на двор или синь, то видока ему не искати, но платити ему продажю 3 гривны; аще ли не будеть на нем знамения, то привести ему видок слово противу слова; а кто будеть почал, тому плати(ти) 60 кун; аче же и кровав придеть, или будеть сам почал, а вылезуть послуси, то то ему за платежъ, оже и били.

  30. Аже ударить мечемь, а не утнеть на смерть, то 3 гривны, а самому гривна за рану, (о)же лечебное; потнеть ли на смерть, а вира.

  31. Аче попъхнеть мужь мужа любо к собе, ли от собе, любо по лицю ударить, ли жердью ударить, а видока два выведуть, то 3 гривны продажи; аже будеть варяг или колбяг, то полная видока вывести, и идета на роту.

  32. О ЧЕЛЯДИ. А челядин скрыеться, а закличють и на торгу, а за 3 дни не выведуть его, а познаеть и (в) третий день, то свой челядин поняти, а оному платити 3 гривны продажи.

  33. АЖЕ КТО ВСЯДЕТЬ НА ЧЮЖЬ КОНЬ. Аже кто всядеть на чюжь конь не прашав, то гривны .

  34. Аче кто конь погубить, или оружье, или порт, а заповесть на торгу, а после познаеть в своем городе, свое ему лицем взяти, а за обиду платити ему 3 гривны.

  35. Аже кто познаеть свое, что будеть погубил или украдено у него что, или конь, или порт, или скотина, то не рци: се мое, но пойди на свод, кде есть взял; сведитеся, кто будеть виноват, на того татба снидеть, тогда он свое возметь, а что погибло будеть с нимь, то же ему начнеть платити; аще будеть коневыи тать, выдати, князю на поток; паки ли будеть клетныи тать, то 3 гривны платити ему.

  36. О СВОДЕ. Аже будеть во одином городе, то ити истьцю до конця того свода; будеть ли свод по землям, то ити ему до третьяго свода; а что будеть лице, то тому платити третьему кунами за лице, а с лицемь ити до конця своду, а истьцю ждати прока; а кде снидеть на конечняго, то тому все платити и продажю.

  37. О ТАТБЕ. Паки ли будеть что татебно купил в торгу, или конь, или порт, или скотину, то выведеть свободна мужа два или мытника; аже начнеть не знати у кого купил, то ити по немь тем видоком на роту, а истьцю свое лице взяти; а что с нимь погибло, а того ему желети, а оному желети своих кун, зане не знаеть у кого купив; познаеть ли на долзе у кого то купил, то свое куны возметь, и сему платити, что у него будеть погибло, а князю продажю.

  38. АЖЕ ПОЗНАЕТЬ КТО ЧЕЛЯДЬ. Аще познаеть кто челядин свои украден, а поиметь и, то оному вести и по кунам до 3-го свода; пояти же челядина в челядин место, а оному дати лице, ать идеть до конечняго свода, а то есть не скот, не лзе речи: (не веде), у кого есмь купил, но по языку ити до конця; а кде будеть конечнии тать, то опять воротять челядина, а свои поиметь, и протор тому же платити, а князю продаже 12 гривен в челядине или украдше.

  39. О СВОДЕ ЖЕ. А ис (с)воего города в чюжю землю свода нетуть, но тако же вывести ему послухи любо мытника, перед кимь же купивше, то истьцю лице взяти, а прока ему желети, что с нимь погибло, а оному своих кун желети.

  40. О ТАТБЕ. Аже убиють кого у клети или у которое татбы, то убиють во пса место; аже ли и додержать света, то вести на княжь двор; оже ли убиють и, а уже будуть людие связана видели, то платити в томь 12 гривен.

  41. Аже крадеть кто скот в хлеве или клеть, то (о)же будеть один, то платити ему 3 гривны и 30 кун; будеть ли их много, всем по 3 гривны и по 30 кун платит(и).

  42. О ТАТБЕ ЖЕ. Аже крадеть скот на поли, или овце, или козы, ли свиньи, 60 кун; будеть ли их много, то всем по 60 кун.

  43. Аже крадеть гумно или жито в яме, то колико их будеть крало, то всем по 3 гривны и по 30 кун.

  44. А у него же погибло, то оже будеть лице, лице поиметь, а за лето возметь по полугривне.

  45. Паки ли лиця не будеть, а будеть был княжь конь, то платити за нь 3 гривны, а за инех по 2 гривны.

    А СЕ УРОЦИ СКОТУ. Аже за кобылу (60) кун, а за вол гривна, а за корову 40 кун, а за. третьяку 30 кун, за лоньщину полгривны, за теля 5 кун, а за свинью 5 кун, а за порося ногата, за овцю 5 кун, за боран ногата, а за жеребець, аже не вседано на нь, гривна кун, за жеребя 6 ногат; то ти уроци смердом, оже платять князю продажю.

  46. АЖЕ БУДУТЬ ХОЛОПИ ТАТЬЕ, СУД КНЯЖЬ. Аже будуть холопы татие любо княжи, любо бояръстии, любо чернечь, их же князь продажею не казнить, зане суть не свободни, то двоиче платить ко истьцю за обиду.

  47. ОЖЕ КТО СКОТА ВЗИЩЕТЬ. Аже кто взищеть кун на друзе, а он ся начнеть запирати, то оже на нь выведеть послуси, то ти поидуть на роту, а он возметъ свое куны; зане же не дал ему кун за много лет, то платити ему за обиду 3 гривны.

  48. Аже кто купець купцю дасть в куплю куны или в гостьбу, то купцю пред послухи кун не имати, послуси ему не надобе, но ити ему самому роте, аже ся почнеть запирати.

  49. О ПОКЛАЖАИ. Аже кто поклажаи кладеть у кого любо, то ту послуха нетуть; но оже начнеть болшим клепати, тому ити роте, у кого то лежал товар: а толко еси у мене положил, зане же ему в бологодел и хоронил товар того.

  50. О РЕЗЕ. Аже кто даеть куны в рез, или настав в мед, или жито во пр(и)соп, то послухи ему ставити, како ся будеть рядил, тако же ему имати.

  51. О МЕСЯЧНЕМЬ РЕЗЕ. (А) месячный рез, оже за мало, то имати ему; заидуть ли ся куны до того же года, то дадять ему куны в треть, а месячный рез погренути.

  52. Послухов ли не будеть, а будеть кун 3 гривны, то ити ему про свое куны роте; будеть ли боле кун, то речи ему тако: промиловался еси, оже еси не ставил послухов.

  53. УСТАВ ВОЛОДИМЕРЬ ВСЕВОЛОДИЧА. Володимер Всеволодичь по Святополце созва дружину свою на Берестовемь: Ратибора киевьского тысячьского, Прокопью белгородьского тысячьского, Станислава переяславьского тысячьского, Нажира, Мирослава, Иванка Чюдиновича Олгова мужа и уставили до третьяго реза, оже емлеть в треть куны; аже кто возметь два реза, то то ему взяти исто; паки ли возметь три резы, то иста ему не взяти.

    Аже кто емлеть по 10 кун от лета на гривну, то того не отметати.

  54. АЖЕ КОТОРЫЙ КУПЕЦЬ ИСТОПИТЬСЯ. Аже который купець, кде любо шед с чюжими кунами, истопиться, любо рать возметь, ли огнь, то не насилити ему, ни продати его; но како начнеть от лета платити, тако же платить, зане же пагуба от бога есть, а не виноват есть; аже ли пропиеться или пробиеться, а в безумьи чюжъ товар испортить, то тако любо тем, чии то товар, ждуть ли ему, а своя им воля, продадять ли, а своя им воля.

  55. О ДОЛЗЕ. Аже кто многим должен будеть, а пришед (гость) из иного города или чюжеземець, а не ведая запустить за нъ товар, а опять начнеть не дати гост(ю) кун, а первии должебити начнуть ему запинати, не дадуче ему кун, то вести и на торг, продати же и отдали же. первое гостины куны, а домашним, что ся останеть кун, тем же ся поделять; паки ли будуть княжи куны, то княжи куны первое взяти, а прок в дел; аже кто много реза имал, не имати тому.

  56. АЖЕ ЗАКУП БЕЖИТЬ. Аже закуп бежить от господы, то обель; идеть ли искат(и) кун, а явлено ходить, или ко князю, или к судиям бежить обиды деля своего господина, то про то не работять его, но дати ему правду.

  57. О ЗАКУПЕ ЖЕ. Аже у господина ролеиныи закуп, а погубить воискии конь, то не платити ему; но еже дал ему господин плуг и борону, от него же купу емлеть, то то погубивше платити; аже ли господин его отслеть на свое орудье, а погибнетъ без него, то того ему не платити.

  58. О ЗАКУПЕ ЖЕ. Аже из хлева выведуть, то закупу того не платити; но (о)же погубить на поли и в двор не вженеть и не затворить, кде ему господин велить, или орудья своя дея, а того погубить, то то ему платити.

  59. Аже господин переобидить закупа, а увидить купу его или отарицю, то то ему все воротити, а за обиду платити ему 60 кун.

  60. Паки ли прииметь на немъ кун, то опять ему воротити куны, что будеть принял, а за обиду платити ему 3 гривны продажи.

  61. Продасть ли господин закупа обель, то наимиту свобода во всех кунах, а господину за обиду платити 12 гривен продаже.

  62. Аже господин бьет закупа про дело, то без вины есть; биеть ли не смысля пьян, а без вины, то яко же в свободнемь платежь, тако же и в закупе.

  63. О ХОЛОПЕ. Аже холоп обелныи выведеть конь чии любо, то платити за нь 2 гривны.

  64. О ЗАКУПЕ. Аже закуп выведеть что, то господин в немь; но оже кде и налезуть, то преди заплатить господин его конь или что будеть ино взял, (а) ему холоп обелныи; и паки ли господин не хотети начнеть платити за нь, а продаст и; отдасть же переди или за конь, или за вол, или за товар, что будеть чюжего взял, а прок ему самому взяти собе.

  65. А СЕ АЖЕ ХОЛОП УДАРИТЬ. А се аже ударить свободна мужа, а убежить в хором, а господин его не выдасть, то платити за нь господину 12 гривен; а затем аче и кде налезетъ удареныи тъ своего истьця, кто его ударил, то Ярослав был уставил убити и, но сынове его по отци уставиша на куны, любо бити розвязавше, любо ли взяти гривна кун за сором.

  66. О ПОСЛУШЬСТВЕ. А послушьства на холопа не складають; но оже не будеть свободнаго, но по нужи сложити на боярьска тивуна, а на инех не складывати; а в мале тяже по нужи възложити на закупа.

  67. О БОРОДЕ. А кто порветь бороду, а въньметь знамение, а вылезуть людие, то 12 гривен продаже; аже без людии, а в поклепе, то нету продаже.

  68. О ЗУБЕ. Аже выбьють зуб, а кровь видять у него во рте, а людье вылезуть, то 12 гривен продаже, а за зуб гривна.

  69. Аже украдеть кто бобр, то 12 гривен.

  70. Аже будеть росечена земля или знамение, им же ловлено, или сеть, то по верви искати татя ли платити продажю.

  71. АЖЕ КТО БОРТЬ РАЗНАМЕНАЕТЬ. Аже разнаменаеть борть, то 12 гривен.

  72. Аже межю перетнеть бортьную, или ролеиную разореть, или дворную тыном перегородить межю, то 12 гривен продажи.

  73. Аже дуб подогнеть знаменьныи или межьныи, то 12 гривен продаже.

  74. А СЕ НАКЛАДИ. А се наклады: 12 гривен, отроку 2 гривны и 20 кун, а самому ехати со отроком на дву коню, сути же на рот овес, а мясо дати овен любо полоть, а инем кормом, что има черево возметь, писцю 10 кун, перекладного 5 кун, на мех две ногате.

  75. А СЕ О БОРТИ. Аже борть подътнеть, то 3 гривны продаже, а за дерево полгривны.

  76. Аже пчелы выдереть, то 3 гривны продажи; а за мед, аже будеть пчелы не лажены, то 10 кун; будеть ли олек, то 5 кун.

  77. Не будеть ли татя, то по следу женуть; аже не будеть следа ли к селу или к товару, а не отсочять от собе следа, ни едуть на след или отбьться, то тем платити татбу и продажю; а след гнати с чюжими людми а с послухи; аже погубять след на гостиньце на велице, а села не будеть, или на пусте, кде же не будеть ни села, ни людии, то не платити ни продажи, ни татбы.

  78. О СМЕРДЕ. Аже смерд мучить смерда без княжа слова, то 3 гривны продажи, а за муку гривна кун; аже огнищанина мучить, то 12 гривен продаже, а за муку гривна.

  79. Аже лодью украдеть, то 60 кун продаже; а лодию лицем воротити; а морьскую лодью 3 гривны, а за набоиную лодью 2 гривны, за челн 20 кун, а за струг гривна.

  80. О ПЕРЕВЕСЕХ. Аже кто подотнеть вервь в перевесе, то 3 гривны продажи, а господину за вервь гривна кун.

  81. Аже кто украдеть в чьем перевесе ястреб или сокол, то продаже 3 гривны, а господину гривна, а за голубь 9 кун, а за куря 9 кун, а за утовь 30 кун, а за гусь 30 кун, а за лебедь 30 кун, а за жеравль 30 кун.

  82. А в сене и в дровех 9 кун, а господину колико будеть воз украдено, то имати ему за воз по 2 ногате.

  83. О ГУМНЕ. Аже зажгуть гумно, то на поток, на грабеж дом его, переди пагубу исплатившю, а в проце князю источити и; тако же аже кто двор зажьжеть.

  84. А кто пакощами конь порежеть или скотину, продаже 12 гривен, а пагубу господину урок платити.

  85. Ты тяже все судять (с) послухи свободными; будеть ли послух холоп, то холопу на правду не вылазити; но оже хощетъ истец, или иметь и, а река тако: по сего речи емлю ти, но яз емлю тя, а не холоп, и емети и на железо; аже обинити и, то емлеть на немь свое; не обинить ли его, платити ему гривна за муку, зане по холопьи речи ял и.

  86. А железного платити 40 кун, а мечнику 5 кун, а пол гривны детьскому; то ти железный урок, кто си в чем емлеть.

  87. Аже иметь на железо по свободных людии речи, либо ли запа на нъ будеть, любо прохожение нощное, или кимь любо образом аже не ожьжетъся, то про муки не платити ему, но одино железное, кто и будеть ял.

  88. О ЖЕНЕ. Аже кто убиетъ жену, то тем же судом судити, яко же и мужа; аже будеть виноват, то пол виры 20 гривен.

  89. А в холопе и в робе виры нетуть; но оже будеть без вины убиен, то за холоп (урок) платити или за робу, а князю 12 гривен продаже.

  90. АЖЕ УМЕРЕТЬ СМЕРД. Аже смерд умреть, то задницю князю; аже будуть дщери у него дома, то даяти часть на не; аже будить за мужем, то не даяти части им.

  91. О ЗАДНИЦЕ БОЯРЬСТЕИ И О ДРУЖЬНЕИ. Аже в боярех либо в дружине, то за князя задниця не идеть; но оже не будеть сынов, а дчери возмуть.

  92. Аже кто умирая разделить дом свои детем, на том же стояти; паки ли без ряду умреть, то всем детем, а на самого часть дати души.

  93. Аже жена сядеть по мужи, то на ню часть дати; а что на ню муж възложить, тому же есть госпожа, а задниця еи мужня не надобе.

  94. Будуть ли дети, то что первое жены, то то возмуть дети матере своея; любо си на жену будеть възложил, обаче матери своей возмуть.

  95. Аже будеть сестра в дому, то тои задниця не имати, но отдадять ю за муж братия, како си могуть.

  96. А СЕ ЗАКААДАЮЧЕ ГОРОД. А се уроци городнику: закладаюче городню, куну взяти, а кончавше ногата; а за корм, и за вологу, и за мяса, и за рыбы 7 кун на неделю, 7 хлебов, 7 уборков пшена, 7 лукон овса на 4 кони; имати же ему, донеле город срубять, а солоду одину дадять 10 лукон.

  97. О МОСТНИЦЕХ. А се мостнику уроци: помостивше мост, взяти от 10 локот по ногате; аже починить моста ветхого, то колико городне починить, то взяти ему по куне от городне; а мостнику самому ехати со отроком на дву коню, 4 лукна овса на неделю, а есть что можеть.

  98. А СЕ О ЗАДНИЦЕ. Аже будуть робьи дети у мужа, то задници им не имати, но свобода им с матерью.

  99. Аже будуть в дому дети мали, а не дъжи ся будуть сами собою печаловати, а мати им поидеть за муж, то кто им ближии будеть, тому же дати на руце и с добытком и с домом, донеле же возмогуть; а товар дати перед людми; а что срезить товаром тем или пригостить, то то ему собе, а истый товар воротить им, а прикуп ему собе, зане кормил и печаловался ими; яже от челяди плод или от скота, то то все поимати лицемь; что ли будеть рестерял, то то все ему платити детем тем; аче же и отчим прииметь дети с задницею, то тако же есть ряд.

  100. А двор без дела отень всяк меншему сыновы.

  101. О ЖЕНЕ. АЖЕ ВОРЧЕТЬСЯ СЕДЕТИ. Аже жена ворчеться седети по мужи, а ростеряеть добыток и поидеть за муж, то платити еи все детем.

  102. Не хотети ли начнуть дети еи ни на дворе, а она начнеть всяко хотети и седети, то творити всяко волю, а детем не дати воли; но что еи дал муж, с тем же еи седети или, свою часть вземше. седети же.

  103. А матерня часть не надобе детем, но кому мати дасть, тому же взяти, дасть ли всем, а вси розделять; без языка ли умретъ, то у кого будеть на дворе была и кто ю кормил, то тому взяти.

  104. Аже будуть двою мужю дети, а одиное матери, то онем своего отця задниця, а онем своего.

  105. Будеть ли потерял своего иночима что, а онех отця, а умретъ, то възворотить брату, на не же и людье вылезуть, что будеть отец его истерял иночимля; а что ему своего отця, то держить.

  106. А матери, который сын добр, перваго ли, другаго ли, тому же дасть свое; аче и вси сынове еи будуть лиси, а дчери можеть дати, кто ю кормить.

  107. А СЕ УРОЦИ СУДЕБНИИ. А се уроци судебнии: от виры 9 кун, а метелнику 9 векош, а от бортное земли 30 кун, (а метнику 12 векши, а от ролеинои земли такожде; а освободивше челядин 9 кун, а митнику 9 векош); а от инех от всех тяжь, кому помогуть, по 4 куны, а метелнику 6 векош.

  108. О ЗАДНИЦЕ. Аже братья ростяжються перед князем о задниию, который детьскии идеть их делит(и), то тому взяты гривна кун.

  109. УРОЦИ РОТНИИ. А се уроци ротнии: от головы 30 кун, а от бортьное земли 30 кун бес трии кун, тако же и от ролеиное земли, а от свободы 9 кун.

  110. О ХОЛОПЬСТВЕ. Холопьство обелное трое: оже кто хотя купить до полу гривны, а послухи поставить, а ногату дасть перед самем холопом; а второе холопьство: поиметь робу без ряду, поиметь ли с рядом, то како ся будеть рядил, на том же стоить; а се третьее холопьство: тивуньство без ряду или привяжеть ключ к собе без ряду: с рядом ли, то како ся будеть рядил, на том же стоить.

  111. А в даче не холоп, ни по хлебе роботять, ни по придатьце; но оже не доходять года, то ворочати ему милость; отходить ли, то не виноват есть.

  112. Аже холоп бежить, а заповесть господин, аже слышав кто или зная и ведая, оже есть холоп, а дасть ему хлеба или укажеть ему путь, то платили ему за холоп 5 гривен, а за робу 6 гривен.

  113. Аже кто переиметь чюж холоп и дасть весть господину его, то имати ему переем гривна; не ублюдеть ли, то платит ему 4 гривны, а пятая переемная ему; а будеть роба, то 5 гривен, а шестая на переем отходить.

  114. Аже кто своего холопа сам досочиться в чьем любо городе, а будеть посадник не ведал его, то, поведавше ему, пояти же ему отрок от него, и шедше увязати и, и дати ему вязебную 10 кун, а переима нетуть; аче упустить и гоня, а собе ему пагуба, а платить в то никто же, тем же и переима нетуть.

  115. Аже кто не ведая чюж холоп усрячеть и, или повесть дееть, любо держить и у собе, а идеть от него, то ити ему роте, яко не ведал есмь, оже есть холоп, а платежа в том нетуть.

  116. Аче же холоп кде куны в(ы)ложить, а он будеть не ведая вдал, то господину выкупати али лишитися его; ведая ли будеть дал, а кун ему лишитися.

  117. Аже пустить холопа в торг, а одолжаеть, то выкупати его господину и не лишитися его.

  118. Аже кто кренеть чюжь холоп не ведая, то первому господину холоп поняти, а оному куны имати, роте ходивше, яко не ведая есмь купил; (ведая ли будеть купил, то кун ему лиху быти).

  119. (Аже холоп бегая будеть добудеть товара, то господину долг), господину же и товар, а не лишитися его.

  120. Аже кто бежа а поиметь суседне что или товар, то господину платити за нь урок, что будеть взял.

  121. Аже холоп крадеть кого любо, то господину выкупати и любо выдати и, с ким будеть крал, а жене и детем не надобе; но оже будуть с ним крали и хоронили, то всех выдати, паки ли, а выкупаеть господин; аже будуть свободнии с ним крали или хоронили, то князю в продаже.

Дополнительные статьи

О КОНЕ. А кто конь купить княж, боярин, или купеч, или сирота, а будеть в коне червь или проесть, а то поидеть к осподарю, у кого будеть купил, а тому свое серебро взяты опять взад.

А се бещестие. А за бещестную гривну золота, аще будеть баба была в золоте и мати, взяты ему 50 гривен за гривну золота; аще будеть баба не была в золоте, а по матери ему не взяти золота, взяти ему гривна серебра; а за гривну сребра пол осме гривне.

О ковании мужем. Аще ли скуеть муж мужа или кого ни есть в вине, или колико седить, взяти железнаго 5 кун, а кормить своим хлебом, ино ему взяти гривна да 5 кун.

А судным кунам ростов нету.

О СИРОТЬЕМ ВЫРЯТЬКЕ. А женка с дчерию, тем страды на 12 лет, по гривне на лето, 20 гривен и 4 гривны кунами.

О муке. Аже утяжю(ть) в мукы, а поседи(ть) у дворянина, 8 ногат за ту муку. А у колоколници бьют(ь) кнутом, за ту муку 80 гривен.

О человеце. Аже человек полгав куны у людей, а побежить в чюжю землю, веры ему не иняти, аки и татю.

О МУЖИ КРОВАВЕ.

Аще приидеть кровав муж на двор или синь, то видока ему не искати, но платити ему продажа за бесчестие, каков будеть; аще ли не будеть на нем знамения, то привести ему видок слово противу слова, а кто будеть почал, тому платити куны в что и объложать; аще же и кровав приидеть, или будеть сам почял, а вылезуть послуси, то то ему за платеж, оже и били.

Аще же ударить мечем или ножем, а не утьне(ть) на смерть, то князю вины 9 гривен, а истьцу за рану судять, а оже лечебное; потнеть ли на смерть, то вира платити.

Аще ль пьхнеть муж мужа любо к себе, любо от себя, ли по лицу ударить, или жръдию ударить, а без зънамения, а видок будеть, бещестие ему платити; аже будеть болярин великых боляр или менших боляр, или людин городскыи, или селянин, то по его пути платити бесчестие; а оже будеть варяг или колобяг, крещения не имея, а будеть има бои, а видок не будеть, ити има роте по своей вере, а любо на жребии, а виноватыи в продажи, в что и обложать.

ПРИМЕЧАНИЯ

А не джи (дюжи) ся будуть — и если не будут в состоянии

Без дела — без раздела, может быть — без распоряжения о разделе наследства, т.е. без завещания

Без языка ли умреть — если по состоянию здоровья не сможет сделать завещательного (устного) распоряжения

Бологодел — благодеяние

Борть — первоначально дупло, затем дупло, наполненное сотами с медом.

В конюсе — относительно конюха, убийство конюха

Вервь — зд. соседская, территориальная община.

Веревная, вирная (подразумевается гривна) — вира

*Видок *— зд. (как и послух) свидетель самой драки, а не доброй жизни истца

Вира — штраф, пеня, которую платит убийца в пользу государственной власти, князя** **

Вложить, в других списках правильнее вылжеть — обманом получит.

Во пса место — как собаку

Волога (влага) — питье

Ворчеться (от вречися)— обещается. В некоторых списках осмыслено как Оборочется — будет вынуждена, обречена

Всяк — каждый, любой

Вырядок (от слова ряд — соглашение) — установление об изменении ряда, о прекращении его действия через определенный срок

*Вязебная *— оплата за задержание, за то, что пойманный будет связан

Голважня — единица измерения соли

Головник — убийца

Городник — архитектор, руководитель строительства, бывший княжеским чиновником

Городня в мосту — опора, сложенная в виде сруба из бревен и засыпанная камнем

Гостьба — то же, но касается гостей — купцов, приезжавших из другого города или другой страны

Дата праву (исправу) — решить дело судом

Дом — имущество, главным образом движимое, в отличие от двора (см. ст. 83), включающего и движимое, и недвижимое имущество

*Досочиться *— выследит

Железное — судебный штраф

Женути — гнать, преследовать

Забой — закрывающееся помещение

Задница, в некоторых списках статок — наследство

Закуп (в списках Пушкинской и Карамзинской групп закупный (наймит) — феодально—зависимый крестьянин

*Зане *— ибо

Зане же — потому что, в связи с тем, что

Заповесть — публично объявит.

Знамение — знак

Знаменный — имеющий знак

Иночам — первый муж по отношению ко второму

Ис дружины — совместно, в составе общины

*Истопиться *— потерпит кораблекрушение

Истый — первоначальный, оставленный в наследство

Кормилец и кормилица — воспитатели младших членов княжеской или боярской семьи

Кренеть — купит

Куны, как и скот — деньги

*Купля *— торговля

*Лице *— украденная вещь

Лицем взяти — взять именно пропавшую вещь, а не другую, равноценную ей

*Локоть *— мера длины

*Лоньщина *— телка, родившаяся в прошлом (лоне) году

Лукно, уборок — меры объема сыпучих тел

Людье вылезуть — окажутся свидетели, подтверждающие утрату.

Межный — стоящий на меже

*Метельник *— вероятно, лицо, ведущее письменный учет собранным вирам и пошлинам

Мостник — княжеский чиновник, руководитель строительства деревянных мостов

*Мытник *— чиновник, собиравший торговые пошлины и следивший за соблюдением правил торговли

На долзе — впоследствии, в вариантах на дорозе — при случайной встрече

Наймит (от слова найм — денежная плата за труд) — другое обозначение закупа, связанное, вероятно, с денежной формой купы

Обель — полностью, в состоянии полного холопа

Овен — баран

*Одину *— один раз на все время

*Олек *— верхняя часть борти, где оставался мед для питания пчел.

Осподарь — господин

От бортное зели — нарушение прав собственности на бортный участок в лесу

От головы — при обвинении в убийстве

Отложиша убиение за голову — отменили кровную месть.

Отрок — младший судебный или административный исполнитель

Пагуба — ущерб

Паки ли — а если

Переем (переим)— вознаграждение за помощь в обнаружении беглого холопа или преступника** **

Перетнеть (от тяти — рубить) — перерубит ограждение в лесу

*Печаловати *— заботиться

По его пути — по его положению

По Ярославе — после смерти Ярослава

Повесть деет — разговаривает

Погренути — забыть; зд. — отменить

*Подотнеть *— подрубит

Подотнеть вервь — перерубит веревку

Поклеп — ложное обвинение

Поклёпная вира — ложное обвинение в убийстве

Полоть — половина, разрубленная вдоль туша коровы

Приимет — возьмет дополнительно, сверх уже взятого

Пробиеться — утратит в драке, схватке

Продажа — денежный штраф

Проесть — рана или язва

Прок в дел — оставшиеся деньги подлежат разделу

*Промиловался *— ошибся, прогадал

Разореть (орати — пахать)— перепашет межу в поле

Рать возметь — потеряет имущество в результате военных действий

Роззнаменование — уничтожение знака, т.е. нарушение права собственности

Ролейный закуп — работающий на поле (ролье)

Ряд — установление, распоряжение, при нескольких участниках — договор, соглашение

Рядович — крестьянин, феодально — зависимый от князя, с которым его формально связывает обязательство по договору

*Свада *— ссора

Серебро — деньги

Сироты — феодально — зависимые крестьяне

Слово противу слова — в подтверждение своих слов

Совокупишеся — собрались

Солод — хлебное зерно, специально обработанное, для получения сладкого вкуса

Сплатити — платить вместе

Срезать (от рез)— получит прибыль от данных в долг денег

*Сути *— сыпать

Товар — как предметы торговли, так и деньги

Третьяка — скотина на третьем году (В.И. Даль)

Тяжа — тяжба, спор

Уборок — мера объема

Урок— в данном случае размер платы за ущерб в результате гибели скота (см. в ст. 45 уроци скоту)** **

Уроци (уроки) — установленное количество чего-либо

Усрячеть — встретит

Утнеть — ткнет, ударит

Утяжют — присудят

*Червь *— болезнь

Чернечь, чернеческый — принадлежащий монахам, т.е. монастырю

Сборник Оглавление Назад Вперёд